Gegožės 15 d. Skouda rajuona savėvaldībės Granauskė R. vėišuojie bėbliuotekuo bova sosėtėkėms so pruopesuorio Balsio Rimanto, katruo muokslėnē darbā – etnoluogėjė, mitoluogėjė, polkluoristėka.
Sosėtėkėms „Žemaitiu truoba – gīvenėma cėntros“ īr ontrāsis bėbliuotekas pruojekta „Verd gīvenėms žemaitiu truobuo“ rėngėnīs, katras torietom mums padietė atsakītė i klausėma aple žemaitiu pasauliežiūra ėr lig šiuolē nauduojemu simbuoliu ištakas.
Pruojekta svarbiausis simbuolis – dvijū galū truobuos makets, katrou padėrba Skouda amatū ėr paslaugū muokīklas kuomanda. Anuos atstuovs vīr. pruopesėjės muokītuos Kumpīs Vėrgėnėjos sakė, ka, dėrbont tou truobelė, dėdėlē gerā atmėnė buočieliu truoba – kas tėn gīvena, kuokius darbus reikėjė nudėrbtė. Ta kad ėr maža truobelė, bet budavuota so meilė. Palinkiejė āna ėlgā būtė žemaitiu papruotiū, kalbuos ėr etnokultūras simbuolio.
Lektuorios Balsīs Rimants, aplonkės daug kėtū šaliū, sosėrinkosius klausītuojus patėkėna, ka kuožnuos tautuos etnokultūruo ėš seniausiu laikū lig šėndėinas ėšlėkės žėnuojėms, sopratėms: truoba nier vėn tik budinks – anuo vėrė kasdėinis šeimuos gīvenėms līgegretē so mitoluoginiu būtībiu bovėmo ėr išmėslās. Tad, parenkont vėita ėr laika truobā statītė, bova atlėiktamas apeigas, ka šeima būtom truopni, gausi ėr anou aplėnktom vėsuokės negandas.
Pruopesuorios pasakuojė, ka žmuoniū trauka i gėmtūsius nomus īr užkuodouta mūsa genūs ėr kraujie, kap vondėns atmintės aple patėrtus gerus ėr sunkius tautuos istuorėnius nutėkėmus.
Lektuorios palinkiejė daugiau bėndrautė su vākās, ka anėi soprasto ėš pruotieviu gauta dvasini palėkėma, gamtuo rastom nusėramėnėma ėr sotarėma so savėm.
Nuognē diekavuojem Skouda muziejou, ka ėš anuo saugīklu skuolintās dāktās galiejuom sokortė emuocėnė aplinka truobuos temā.
Pruojekta „Verd gīvenėms žemaitiu truobuo" rem piningās Lietuvos Kultūros Taryba ėr Skouda rajuona savivaldībės adminėstracėjė.
